Paylaş

“Aşpazlıq” sənəti hər zaman xüsusi bacarıq tələb edən sahələrdən sayılıb. Bu sahəyə qadınlar qədər, kişilərin də marağı var.

Gənc olmasına baxmayaraq, artıq baş aşpaz kimi fəaliyyət göstərən Rəşad Ağayev deyir ki, onun aşpazlığa marağı 13-14 yaşlarında yaranıb:

“Biraz “Ratatuy” filminə bənzəyir. Şablon olsa da, bütün aşpazların dediyi kimi, bir dəfə evdə tək qalmışdım, ac idim, evdəki ərzaqlara baxdım. İçimdən nəsə hazırlamaq gəldi. Həyatımda birinci dəfə bişirdiyim yemək toyuq supu oldu. O vaxtdan həvəs yarandı, aşpazlığa başladım”.

Rəşad Ağayev təmizlik, cəldlik və fantaziyanın peşəkar aşpazlıq üçün əsas amillər olduğunu deyir:

“İnsanın götürməsindən də çox şey asılıdır. Aşpazlar sonradan öyrənə bilərlər, amma “əl duzu” deyilən bir şey var ki, o, insanın qanında olmalıdır. Aşpazın peşəkar olduğunu bir çox cəhətlərdən bilmək olur. Ərzaqları doğramasından, yeməyi bişirməsindən, təqdimatından və.s bilmək olur. Qeyi-peşəkar asta doğrayır, düzgün doğramır. Peşəkar aşpaz yemək bişirəndə ərzaqaların ardıcıllığını  elə qurur ki, peşəkar olduğu məlum olur. Tərəvəz supu bişirsək, orada elə tərəvəzlər var ki, tez bişir. Məsələn pomidoru bibər və soğanla eyni vaxtda vursaq, o əzilmiş olur. Ardıcıllıqla vurduqda, yəni pomidoru sonda vurub suyunu əlavə edəndə tam başqa cür olur”

Baş aşpaz, qeyd edir ki, dünyanın ən güclü mətbəxi Fransa mətbəxi sayılsa da, ən dadlı mətbəx məhz Azərbaycan mətbəxidir:

“Bildiyimiz kimi, Azərbaycan milli mətbəxində çox yağlı və kolorili yeməklər var. Yəni quyruqdan, kərə yağından çox istifadə olunur. Ona görə də bizim məqsədimiz Azərbaycan milli mətbəxini Avropa yeməklərinin stilində,  maksimum dərəcədə yağlılığı az, porsiyaları azaldıb individual şəkildə təqdim etməkdir. Yeməklərin çəkisi 150 qramdan artıq olmamalıdır, boşqabın istiliyi olmalıdır. Tərəvəzlərdən istifadə edərkən onları tam bişirmək olmaz, bibərin üst qabığı götürülməlidir. Yeməyin hündürlüyü olmalıdır. Bizdə elə yeməklər var ki, onlar böyükdür, balacalaşdırıb vermək çətin olur. Amma alınır bizdə, dadını da uyğunlaşdırırıq”.

Rəşad Ağayev aşpazlıq sənətinin sirlərinə yiyələnmək istəyən  gənclərə peşəkar olmağı məsləhət görür, deyir ki, indi dırnaqarası aşpazlar ortaya çıxıb və bu işi yarım qiymətə, keyfiyyətsiz görürlər:

“Əgər işi görürsənsə, doğurdan da, bu sənətin içində olmalısan. Mən fikirləşirəm ki, bir aşpaz 10-15 ilə püxtələşir. Həqiqətən də, sənəti öyrənmək istəyirlərsə, həmin aşpazın yanında 1-2 il pulsuz çalışmalıdırlar. Bir də ki müəllimləri seçəndə ən vacibi odur ki, peşəkar seçsinlər. İndi elə aşpazlar var ki, 15-16 yaşları var, yanına tələbə götürür”.

GSR.fm